2008tik gaur egunera arte diputatu, Gipuzkoa ordezkatuz, Joseba Agirretxea Urresti (Ondarroa, 1966) EAJ-PNVren Kongresurako hautagaitza zerrendaren bigarren postuan dago lurralde historikoan. Azken legegintzaldian Nekazaritza, Arrantza eta Elikadura Batzordeko ordezkari jeltzalea izan da, eta batzorde horretako presidentea ere bai; horrez gain, Berdintasuna; Defentsa; Kultura eta Kirola, eta Kontsumo batzordeko bozeramailea ere izan da.

Joseba Agirretxea gudari baten biloba da eta, horregatik, oso gertutik bizi izan du beti politika. Ondarroan jaio arren, Donostian bizi da duela 30 urte baino gehiagotik. Ibilbide profesionala EiTBn hasi zuen, baina 2004an Gipuzkoako Batzar Nagusietako aholkulari taldean sartu zen, eta hortik Eusko Jaurlaritzako Komunikazio eta Kanpo Harremanetarako aholkularitzara egin zuen jauzi, Juan Jose Ibarretxe lehendakari zela. Zinema eta musika oso gustuko ditu, eta sukaldaritza ere maite du.