EAJ-PNVren Euzko Abertzaleak taldeak gaur Diputatuen Kongresuko osoko bilkuran eztabaidatuko den Gastu Mugaren aldeko botoa emango du. Iragan ostiralean Aitor Esteban bozeramaile jeltzaleak irratiko elkarrizketan adierazi zuen egoera “bideratzea” gerta litekeela, eta jarrera hori da gaur finkatu dena.

Euzko Abertzaleak legebiltzar taldeak uste du Euskadiko eta Espainiako gobernuen arteko aldebitasuna finkatu izana eta Gobernu biek iragan maiatzean Kupoari buruz adostu zuten akordioa “faktore garrantzitsu” izan direla eta itxaropentsu agertu da Autonomi Erkidegoekin defiziterako adostu den % 0,1eko igoera Euskadira ere ekartzeko egon daitekeen aukerarekin. Hori dela eta, “koherentziaz eta erantzukizunez jardun nahi dugulako eta Euskadirentzat onuragarria delako” bost diputatu jeltzaleek ´baietza´ emango diote Gastu Mugari.

Halaber, talde jeltzaleak balorazio positiboa eman dio Espainiako Gobernuak Ministroen Kontseiluan onetsi duen gastu muga ez finantzarioaren igoerari.

Edozein kasutan, EAJ-PNVk jakinarazi du Gastu Muga neurri “tekniko” jotzen dela eta “balio politikorik” ez duela, eta alde bozkatzeko hartu den erabakiak ez duela inolako zerikusirik Estatuko Aurrekontu Orokorrei emango zaien botoarekin, oraindik “ezagutu ere egiten ez direlako”.