EAJ-PNVren Euzko Abertzaleak taldeak Alderdi Popularrari egotzi dio gaur  Donostia 2016  egitasmoarekin "inplikaziorik eta konpromisorik" ez duela, EAJ-PNVk Estatuko Aurrekontu Orokorretan  Donostia 2016 europar hiritartasunerako egitasmo honetarako finantzaketa igotzeko aurkeztu duen proposamenari uko egin diola ikusita. EAJk salatu duenez "ezezko honekin Kultura Ministerioak lehenagotik emandako hitza jaten du" .

Legebiltzar taldeek Aurrekontu Egitasmoari aurkeztu dizkioten zuzenketak eztabaidatzeko Batzordean, Euzko Abertzaleak taldeak azpimarratu du Donostia 2016 egitasmorako aurreikusi diren 1,5 milioi euroak "eznahiko" direla eta 3 milioi euroko igoera eskatu du  "Donostiarentzat eta Euskadi osoarentzat horren garrantzitsua den egitasmo global honentzat" .

Talde Popularrak bozketa egin baino lehen iragarri du zuzenketa hori ez dela onartuko eta jarrera hori izan da Euzko Abertzaleak taldeak salatu duena: "Moldeak ere ez dituzte zaintzen; bozketa baino lehen ezetza esatea ere bada bozketa aldez aurretik  ebaztea. Hona hemen aurrekontu eta izapide osoa adar jotze hutsa delako beste adierazlea" salatu du Pedro Azpiazuk, Aurrekontu Batzordean jeltzaleen bozeramailea denak .

Euzko Abertzaleak taldeak era berean gogoratu du 1,5 milioi euroko aurrekontua "beste estatu batzuek europar hiriei egin dizkieten ekarpenak baino baxuagoa da eta   ez dator bat gainerako erakundeek Donostia 2016 Fundazioari egingo dizkioten ekarpenekin". Zentzu horretan gogoratu du Jose Ignacio Wert Ministro ohiak hitza eman zuela "beharrezko guztia" egingo zuela Hiritartasun Kulturala arrakasta izan dadin. Kultura gaietarako Estatuko Idazkariak Joseba Agirretxeari, Euzko Abertzaleak taldeko bozeramaileari, iragarri zion bere asmoa zela azken ekarpena 4,5 milioi eurokoa izatea .

“Ez dugu ulertzen Espainiar Gobernuak zergatik ez duen egitasmo honek merezi duen neurrian babesten. Tamalgarria da" esan du Agirretxeak. Dena dela, Diputatu jeltzaleak iragarri egin duenez "2016 urterako Estatuko Aurrekontu Orokorretarako parlamentuko tramitea ez da oraindik amaitu, eta guk ekin egingo diogu PPren eta Kultura Ministerioaren konpromisoa orain arte erakutsitakoa baino handiagoa izan dadin".