Diputatuen Kongresuko EAJ-PNV Legebiltzar Taldeak Legez Besteko Proposamena aurkeztu du Forondako aireportuan 24 orduko zerbitzua berrezartzea eskatzeko.

Sustapen Batzordean aintzat hartzeko eta eztabaidatzeko aurkeztu den ekimenaren bidez, Euzko Abertzaleak Legebiltzar Taldeak era berean eskatu du Mugako Ikuskaritza Postua berrezartzea, salgai galkorren eta animalien trafikoari ekiteko, eta aireportua erabat operatibo egon dadin beharko liratekeen giza baliabideen eta baliabide teknikoen planifikazioa egitea eskatu du.

Iñigo Barandiaranek, Sustapen gaietarako bozeramaile jeltzaleak, baieztatu du Forondak aireportu gisa azpiegitura "aparta" eskaintzen duela. "Pistaren ezaugarriak, hegazkinen gunea, lineadun jardueren antolaketa, errepideekin dauden konexioak, bulegoak, komunikazio sareak eta baldintzak, metereologia aldetik ere, bikainak direla esan dezakegu" azpimarratu du Barandiaranek.

Barandiaranek era berean adierazi duenez "Foronda karga garraioan hazten ari da" eta "hegaldi komertzialetarako dagoen eskaria kontuan hartuta, AENAk astean 32 ordu gehiago jarri nahi ditu aireportuaren ordutegi operatiboan".

Dena dela, EAJ-PNVk bere ekimenean salatu duenez "behar litzatekeena baino erabilera txikiagoa ematen zaio aireportuari", 2012 urtean ordutegi operatiboa murriztu eta 2013 urtean Mugako Ikuskaritza Postua itxi zenez geroztik. Era berean gaineratu duenez "ulertezina da" Forondak "hurbileko aireportuetan desbideratu diren edo bertan behera utzi diren hegaldiak ezin hartzea, aldian behingo gertatzen diren gertaera metereologikoak direla eta".