Mikel Legardak, EAJ-PNVren Euzko Abertzaleak taldeko bozeramaile ondokoak, Barne Ministroari gogoratu dizkio gaur EAEk segurtasun alorrean dituen eskuduntzak,besteak beste hiritarren eskubide eta askatasunak Ertzaintzaren bidez bermatzea, espetxe legeriaren betearazpena eta espetxeen kudeaketa, oraindik transferitu gabe daudenak, eta berriz eskatu dio "Segurtasun Batzordearen baitan elkarrizketari heltzea segurtasun alorrean Estatuko erakundeekin urratutako konfiantza berrezarri ahal izateko".

Zentzu honetan, Legardak azaldu du Segurtasun Batzordean eztabaidatu beharreko "gai delikatuak" daudela,besteak beste Ertzaintzaren plantilla berrien ingurukoa, Legardaren esanetan "funtsezkoa" dena, eta polizien arteko lankidetza operatibo eta estrategikoa, bozeramaile jeltzaleak "ezinbesteko" jotzen duena. “Ertzaintza bete-betean sartu behar da Terrorismoaren eta Krimen Antolatuaren kontrako Inteligentzia Zentroan" baieztatu du.

Halaber, Barne Ministroak izen bereko Batzordean izan duen agerraldian, Mikel Legardak eskatu dio "poliziako funtzionarioen egitekoak konstituzioak aitortzen dizkieten funtzioetara egokitzeko helburuari buruz zintzotasun osoz hitz egitea" eta ETAren indarkeriaren amaieraz geroztik zabaldu behar den normalizazio prozesurako urratsak ematea eskatu dio.

“Ezinbestekoa da indarkeriaren amaiera ordenatua bideratzea, amaiera desordenatuak aurreikusi ez daitezkeen ondorioak dituelako elkarbizitza berritzailera begira" esan du Legardak. "Ez badugu egiten, etorkizuna zamatu egiten dugu biktimei eragindako minaren aitortza oso egoera ahulean uzten dugulako,eta hori ETAk egin behar du; airean uzten du bizikidetzarako pedagogia partekatura eramango gaituen oroimenaren artikulazioa,eta bertan behera uzten du aitzakiarik gabeko egoera finkatzea bestelako espetxe eta gizarteratze politika bultzatzeko orduan" baieztatu du. Diputatu jeltzaleak era berean eskatu du "lau ardatzen inguruan garatuko den amaiera ordenatua burutzea: ETAri zuzendutako exijentzia, armagabetzearen eta talde gisa desagertzearen alde bakarreko egiaztapen atzeraezina, baldintzarik gabea egiaztagarria eta behin betikoa; hausnarketa kritikoa terrorismo forma guztien aurrean eta iraganean urratutako giza eskubideei buruz; biktima guztiei eragindako min bidegabeari buruzko egia eta erreparazioa emateko konpromisoa; eta bizikidetzara eta gizarteratzera bideratutako elkarbizitza aktibatzea".

Mikel Legardak amaitzeko azpimarratu duenez Hiritarren Segurtasuneko Legea "beste lege batek ordezkatzea komeniko litzateke, legea berriro pentsatu eta aldarazi beharko litzateke" , oraingo hau hiritarra "babesik gabe utzi duelako".