Euzko Abertzaleak taldeko Sustapen gaietarako bozeramaile Iñigo Barandiaranek baieztatu duenez “Bilbo eta Pasaiako portuen defentsa eta Europa mailako Ebazpena Lege Dekretu baten bidez betetzea bideragarria dela ulertzea izan dira akordio batzuetara eraman gaituzten ardatz nagusiak”. Gabriel Aresti euskal poetaren hitzak gogoratuz, Barandiaranek euskal diputatuek “gai honetan eta beste hainbatetan” egin duten lana laburbildu du: “Nere aitaren etxea defendituko dut”, esan du.

Barandiaranek gaur bozkatu den testuan egin diren aldaketak eta aldarazpenak azaldu ditu eta  ildo beretik adierazi duenez “lehenago Europako Epaimahai Gorenak ezarritako zigorrak saihestea beharrezko jotzen bazen, segurtasuna eta bideragarritasuna ere eman behar zaie portuen erregimen juridikoari eta, Euskadiri dagokion aldetik, Pasaia eta Bilboko portuei”.