Iñigo Barandiaran Diputatuen Kongresuan EAJ-PNVren Euzko Abertzaleak taldearen Sustapen batzordearen bozeramaileak De la Serna Ministroari eskatu dio autobideen kudeaketa (AP-1 eta AP-68) Foru Aldundiei transferitzea, Gernikako Estatutuak ezartzen duenari men eginez .

Sustapen Ministerioak Diputatuen Kongresuan Garraio eta Azpiegiturak berritzeko Plana aurkeztu duela aprobetxaturik, Barandiaranek gogoratu du Foru Aldundiak direla gai honen eskuduntza dutenak, beraiek direlako errepideen eraikuntza eta kudeaketa eta garraio sistemak kudeatzen dituztenak, eta zentzu horretan exijitu du Estatutua betetzea eta AP-1 eta AP-68 errepideen kudeaketa Foru Aldundien ardurapean jartzea. Ministroak, bere aldetik, Espainiako Gobernua AP-1 autobidean indarrean dagoen kontratua ez luzatzea planteatzen ari dela esan du. Jeltzalearen aburuz, gauzak horrela, une hori egokia izango litzateke transferentzia gauzatzeko.

Sustapen Ministerioak aurkeztutako Planari dagokionez, Barandiaranek adierazi du “asmo handikoa” dela baina gaineratu du “galderak sortzen dituela”. Zentzu horretan Sustapen Ministroari galdetu dio Plan horrek “EAEko eskumen esparrua kontuan hartzen ote duen” eta “Ministerioak nola jardun nahi ote duen hiru Foru Aldundietako errepideak kudeatzeko sailekin”. Diputatuak berak adierazi duenez, Planean aurreikusitako jarduera batzuk Herrialde Historikoen esparruan existitzen dira, besteak beste errepideen digitalizazio eta mapeoa eta ibilgailuen kontrola egitea ibilgailuak gelditu gabe. Hori dela eta, De la Sernari eskatu dio “gai horiek guztiak dagoeneko abian dauden esperientziekin alderatzea”.

Iñigo Barandiaranek era berean azaldu duenez ezbaiak daude kudeaketa ereduei dagokienez, eta Euskadin errepideen sostengurako gaitasun handiko bideetan bidesariak ezartzea hobetsi dela gogoratu ondoren, Ministerioaren Plan berriak aurreikusten dituen kudeaketa ereduak ezagutzeko interesa erakutsi du.