Euskal Taldeak zuzenketa batzuk sartzea lortu du Estatuko Aurrekontu Orokorren lehen izapidean, Osoko Bilkuratik igaro ondoren. Ponentziak gaur arratsaldean egindako bileran, EAJ-PNVk bere bost zuzenketa Aurrekontuen Lege Proiektuaren testuan jasotzea lortu du. Testu hori datorren astean eztabaidatu eta bozkatu beharko da Batzordean.

EAJ-PNVk uste du lehen urratsa dela, baina behin eta berriz esan du negoziazioak aurrera jarraitzen duela, eta oraindik ere badagoela bidea Kontuei behin betiko baiezkoa emateko. Diputatu jeltzaleek, Taldeko bozeramaile Aitor Esteban eta aurrekontuen bozeramaile Idoia Sagastizabal buru dituztela, lanean jarraituko dute, akordioaren eta negoziazioaren bidez, Estatuko Aurrekontu Orokorren Lege Proiektuari zuzenketa gehiago sartzeko, Kontuen funtsezko hobekuntza ekarriko dutenak.

KIROL KLUBAK

Alde batetik, kirol-klubei buruzko hiru zuzenketak lege-proiektuaren testuan sartzea lortu du Euskal Taldeak. Lehenik eta behin, indarrean dagoen Kirolaren Legean jasotako obligazioa ezabatzera bideratutako zuzenketa da, hau da, klub profesionalak Kirol Sozietate Anonimo (ELZ) bihurtu behar izatea lanbide-kategoriara sartzean; eta, bigarrenik, klubek beren zuzendaritza-batzordeetako kide izateko baldintzak askatasunez ezarri ahal izateko zuzenketa, hala nola antzinatasuna edo abalen aurkezpena. “Hori guztia, jarduera erraztuko duen forma juridikorik onena bilatzeko helburuarekin”.

FORU ESKUDUNTZAK ETA TASA SINPLIFIKATUA PORTUETAN

Gainera, Ponentziaren testuak bi zuzenketa gehitu dizkio Euskal Taldearen artikuluei. Alde batetik, Toki Araubidearen Oinarriei buruzko Legean, foru-lurraldeei gaikuntza nazionaleko toki-administrazioko funtzionarioen izendapenari buruzko ahalmenak aitortzea (idazkariak eta kontu-hartzaileak). Horrela, foru-izaerako eskumen historikoen erabilera bermatzen da. Bestalde, Euskal Taldearen zuzenketari esker, Portuen Legea aldatuko da, ibilgailuen garraiorako tasa sinplifikatua ibilgailuen ingurumen-prestazioak hobetu nahi dituzten teknologiak dituztenei ere aplika dakien.

GARRANTZITSUA: Ondorengo estekan ikus daiteke Euskal Taldeak aurkeztutako zuzenketak, 2022rako Estatuko Aurrekontu Orokorren Lege Egitasmoaren ponentzian jaso direnak:

https://kongresua.eaj-pnv.eus/eu/agiriak/20284/enmiendas-del-grupo-vasco-incorporadas-en-ponencia