Idoia Sagastizabalek, Energiaren arloko Euskal Taldearen bozeramaileak, gasaren prezioarentzat iragarritako muga lehenbailehen ezartzeko eskatu dio Teresa Ribera presidenteordeari, baina ohartarazi du neurri horretaz gain (arnasa hartu ahal izatea ekarriko duena) merkatu elektrikoan egiturazko erreformak egin behar direla.

Kontrol saioan hitza hartu duenean, Sagastizabalek ziurtatu du "iberiar salbuespena" deiturikoaren atzerapenak (iragarri zenetik 47 eguneko atzerapena darama) mesfidantza sortzen duela herritarrengan, bai erabiltzaile partikularrengan (fakturetan prezio oso altuak izaten jarraitzen dute), bai enpresengan (diruzaintzako tentsioak dituzte, marjinak ahalik eta gehien presatzen ari direlako). Nolanahi ere, eta Euskal Taldeak martxoan proposatutako neurri horren bozketan PSOE abstenitu egin zela gogorarazi ondoren, diputatu jeltzaleak beharrezkotzat jo du gasaren prezioa argitik bereiztea, baina ohartarazi du neurri hori egoeraren araberakoa dela eta ezin garela horretara mugatu.

"Ezin dugu espero guztia aldi baterako karta batekin lortzea; egiturazko neurriak behar ditugu, eta merkatu elektrikoa erreformatu", ziurtatu du. Hala, eta besteak beste, PVPC tarifa birformulatzea eskatu du, soilik pull delakoari atxikita egon ez dadin, eta alderdi hori ez dago Europaren menpe eta gure esku dago; edo, bestela, epe jakin baterako merkatuari likidezia ematea. Era berean, gogorarazi du Gobernuak oraindik ez dituela martxan jarri energia primarioen enkanteak.

“Hau ez bada merkatu elektrikoa erreformatzeko eta egiturazko erreformak proposatzeko unea, noiz izango da? Ezin gara aldi baterako neurri bakar batera mugatu; merkatu elektrikoaren premiazko erreforma hori behar dugu”, esan du.