Aitor Esteban Euskal Taldearen bozeramaileak txalotu egin du "azkenean" Trafikoko zereginak eta zerbitzuak Nafarroari transferituko zaizkiola, EAJ-PNVk aurreko legealdian Pedro Sanchezen inbestidurarako adostutako akordioan jasotakoa betez. Estebanek gogora ekarri du proposamen hori Nafarroako ordezkari jeltzaleekin egin zela 2018ko Nafarroa Oinez-en, Altsasun, eta Andoni Ortuzarren eta Pedro Sanchezen sinadurarekin zehaztu zela, 2019ko abenduaren 30ean. Halaber, Estebanek deitoratu du denbora luzea behar izan dela eta Nafarroako Foru Eraentza Berrezarri eta Hobetzeko Lege Organikoa aldatu behar izan dela, Auzitegi Gorenak Trafiko transferentzia hori baliogabetu zuen epai baten ostean: "Auzitegi Gorenak egin duena arriskutsua da Nafarroako Foruarentzat, bai eta forutasun kontzeptu osoarentzat ere. Ez genukeen honaino iritsi behar".

Hitza hartzeko  izan duen tartean, jeltzaleen bozeramaileak gogorarazi du transferentzia itun hau beste talde batzuek baliatu izan dutela eta eurena balitz bezala “saldu” dutela, baina Uxue Barkos Nafarroako presidente zen garaian negoziatu zela. Azkenik, Esteban PPri eta UPNri esan dienez "Forua gustuko duzuela esaten duzue, baina edukirik gabe. Gauzatu behar denean eta edukia ematen zaionean, arrautza huts bihurtzen da”.

Euskal Taldeak lanean jarraitzen du Madrilen Nafarroako herritarren ahotsa izateko eta  Nafarroaren interesak defendatzeko.