Zapateroren “anbiguotasuna” deitoratu ostean, hurrengo aurreikuspena ere egin du EAJren bozeramaileak: “Ez dakit nik edota Zapaterok parlamentu honetan jarraituko dugun etorkizunean, baina oso argi dut EAJk euskal herritarren gehiengoaren helburu nazionalak defendatzen jarraituko duela, tartean Euskal Herria nazio bezala onartua izatea. Argitasunez, irmotasunez, zentzuz, burua argi izanez baina hankak lurrean mantenduz egingo du, gainera”.

Horrez gain, hurrengoa ere gaineratu du Erkorekak: “Arlo sozialak eta ekonomikoak ere izango dira etorkizunean EAJko eskaeren artean, betiere haustura bilatu gabe, eraikiz eta indarrak metatuz. Espainiako presidenteari dagokion aulkian eseriko denak horiek guztiak errespetatzea espero dut”.

Azkenik, legealdia amaitu baino lehen Euskal Herriaren helburu nazionalen inguruan duen jarrera argitzeko eskatu dio Zapaterori Erkorekak: “Ni ez bainaiz hurrengo hauteskunde kanpainan presidentearekin eztabaidatzeko aukera izango duten pribilegiatuen klubeko partaide”.