EAJ-PNVk emango duen bozkari dagokionez, buruzagi jeltzaleek zera azpimarratu dute “honakoa da erreforma sakona, zehatz-mehatz aztertu beharko diren ñabardura asko ditu, eta horiek negoziatzen saiatuko gara parlamentuan, batez ere negoziaketa kolektiboari dagozkionak”.

Erkorekak gaineratu duenez “Euzko Alderdi Jeltzaleak ez du ondo ikusten Gobernuak lan erreforma hau Erret Lege Dekretu bidez onartzea, gizarte eragileen akordiorik eta legebiltzar eztabaidarik gabe; ondorioz, Gobernuari eta Alderdi Popularrari eskatzen diogu Lege Egitasmo gisa tramitatzea onartzea”.

Amaitzeko azpimarratu duenez “Enpleguaren sorkuntza ezin da lan erreforma hutsetik etorri. Gobernuak jakin badaki enplegua sustatzeko neurri berezia behar direla; ez soilik Espainiar Estatuan, baizik eta baita europar mailan ere, azken asteotan legebiltzar egoitzan adierazi izan dugun moduan. Zentzu honetan, EAJ-PNVk  Mariano Rajoyri eskatu dio enplegua sortzeko planteamendu globala Europan sustatu eta babestea”.

 Garzonen kontrako auzia gizartea justiziatik urruntzen du

EAJ-PNVren ustez, Garzon epailearen ibilbide judizialak beltzune asko izan ditu, baina mota honetako gai bategatik ezgaitua izatea gizartearengan haserrea sortarazi du. Kongresuko EAJ-PNV Euskal Taldearen bozeramaile den Josu Erkorekaren aburuz, Euskadin eskarmentu handia dugu Garzonen ibilbide judizialarekin eta, bereziki, zenbait sumarioetan izan dituen gehiegikeriekin.

“Baina, behin hau aitortuta, -gaineratu du Erkorekak- harrigarria egiten zaigu arrazoi hauengatik kondenatua izatea. Erabaki honek, gizartea justiziatik aldentzen du. Beti esaten dugu justizia herritik datorrela, baina badirudi epai hau ez dela justua eta ez duela bat egiten gizarteak eskatzen duenarekin”.