Josu Erkorekak azaldu duenez “ezinbestekoa da Nazio Batuek Mendebaldeko Sahararen inguruko planean, giza eskubideen gaineko kapitulua sartzea”. Euzko Abertzaleak taldearen bozeramaileak defendatu duenez  Mendebaldeko Sahararen gatazkari behin betiko eta bidezko konponbidea emateko akordioa ikusi arte “beharrezkoa izango da trantsiziozko jo dezakegun fase hau gizabidetsuago egiteko neurriak hartzea”.

“Saharar herriari autodeterminazio aitortzarik eman ez eta gatazka konpondu gabe geratzea, berez da giza eskubideen urratze ageria, baina giza eskubide batzuen urratzeak ekiditerik ezak ezin gaitu eraman lehengoak bezain larri eta kezkagarriak diren beste giza eskubideei zor zaien errespetua ez zaintzera” azpimarratu du Erkorekak.