“Ezin da nahikotasunaz hitz egin, pentsio hau jasotzen duen kolektiboaren erdia txirotasun atalase azpian bizi denean” salatu du Olabarriak. “Konstituzioa ez da betetzen alargunei eman beharreko babesari dagokionez” gaineratu du.

Diputatu jeltzaleak gogora ekarri du Alderdi Popularrak oposizioan egon den aurreko legegintzaldietan mantendu izan duen  jarrera, alargun pentsioa igotzearen alde agertu baita. Hori dela eta, Parlamentuko Talde Popularrari eskatu dio, lehenago egin den defentsa horri jarraiki, gizarte eragileekin eta Parlamentuko Taldeekin ados ditzala, alargun pentsioa hildako ezkontidearen errenta edo pentsioaren % 52tik 70ra igotzeko arauak.