Abdikazio Lege Organikoaren inguruko eztabaidaren kariaz, Estebanek gogora ekarri du Euzko Abertzaleak taldeak arauaren bozketan abstentzioa bozkatuko duela "1978an izan genuen jarrera bera mantentzen dugulako; ez dugu konpromisorik sentitzen Estatuan marko konstituzionalari eman zitzaion babesarekiko", eta gaineratu duenez "Gobernuari gure onespena eman diezaiogun, Konstituzioaren osotasuna birnegoziatu beharko da, Estatu eredu bera eztabaidatu eta adostu beharko da".

Edozein kasutan, "Estatuak inposatutako joko arauei men eginez" eta "XXI, mendean Errepublika denborekin ondoen doan Estatu forma dela" aitortu ondoren, Estebanek hurrengo Erregeari zera iragarri dio "funtzioren bat izan nahi badu Espainiar Estatua osatzen duten nazio ezberdinen asmoei eman behar die erantzuna, eta ezer baino lehenago aitortza eman behar die" eta "adorez eta erabakimena" eskatu dizkio "Estatuaren eta hiritarren arazoei errealismoz ekiteko eta Estatu eredu berrirako bidea hasteko" .

Era berean baieztatu du Felipe VI.ak " tronua irabazi " beharko duela eta eskatu dio "jarduera publikoan eta Errege Etxearen finantzetan zein ondare pertsonalean gardentasuna erakustea", eta auzitan jarri du Espainiar Konstituzioak Estatu Buruari ematen dion "bortxa-ezintasuna". "Ez da ulergarria Estatu Buruak esparru pribatuan egiten dituen jarduerez zigor esparruan edo zibilean erantzun behar ez izatea: zerk arrazoitu ahal du arduragabe izatea, gainerako hiritarrak ez bezala? ”.

Euzko Abertzaleak taldeko bozeramaileak amaitzeko gogoratu duenez "EAJ euskal esparruko alderdia da" bere helburuen artean Espainiak hartuko duen Estatu eredua ez dagoelako, "eta errepublikazalea da" EAJren idearioaren arabera ordezkaritza politika herriaren borondatetik datorrelako. Zentzu horretan gaineratu duenez "Monarkia modernizatzeko baldintzak ematen badira eta euskal nazioa subjektu politiko gisa aitortzen bada, EAJk gobernagarritasunarekin eta bizikidetzarekin duen konpromisoa mantenduko du une honek eskatzen dion erantzukizun mailarekin".