EAJ-PNVren taldeak nahi du Gobernuak Diputatuen Kongresuan onartutako Legez besteko Proposamen,Mozio eta Ebazpenei buruzko azalpenak ematea. Horretarako, Araudia Aldarazteko Lege Proposamen bidez, lege izaerarik ez duten akordioak kontrolatzeko mekanismoa proposatu du.

Jeltzaleek aurkeztutako idazkiaren arabera "oraingo Araudiarekin ezinezkoa da Gobernuak Legebiltzarreko agindu ez legegileak kontuan hartzen ote dituen egiaztatzea", eta horrek Ganberarentzat "kaltea" suposatzen du eta egoera "konpontzea" proposatu du.

Hartara, bilkura sasoi bakoitzeko lehen hilabete baliodunean Gobernuak Ganberari bidali beharko dizkio "Osoko Bilkuran zein Batzordeetan aurreko bilkura sasoian onartutako legez besteko proposamen,mozio eta ebazpenen egoerari eta betepen mailari buruzko txostena eta aurreko aldietan bete gabe geratu diren ebazpenen egoerari buruzkoa". Eta txostena Ganberan erregistratu ondorengo hamabostaldian "Araudi Batzordean Exekutiboko ordezkari batek hitz egingo du txostena azaltzeko eta Legebiltzar Taldeen galderak erantzuteko".

Amaitzeko, Euzko Abertzaleak legebiltzar taldeak gogoratu nahi du proposatutako Aldarazpen hau "beste ganbera legegile batzuetan funtzionatzen duten ereduetan oinarrituta" planteatu dela.