Aitor Esteban EAJ-PNVren Euzko Abertzaleak taldeko bozeramaileak atzokoan Jordi Sánchez eta Jordi Cuixart, hurrenez hurren ANC eta Òmniun Cultural taldeetako buruak, atxilotu izana gaitzetsi du eta deitoratu duenez “horrek ez du giroa baretzen lagunduko”.

Komunikabideei eskainitako adierazpenetan, Estebanek baieztatu du sedizio delitua ez datorrela bat izandako gertakariekin, bere esanetan “arrazoi berberagatik, sedizioa leporatu beharko baitzitzaien desjabetzeak eragotzi zituzten pertsonei”. Zentzu berean kritikatu du bi ordezkarientzat baldintza gabeko kartzelatzea ezarri izana. “Kontu hau guztia bihurrera hartu da” baieztatu du.

Dena dela eta “gertakari horiek giroa baretzen laguntzen ez duten arren” Esteban “itxaropentsu” agertu da azkenean “gauzak bideratzea eta elkarrizketa gailentzea” gerta litekeelako. “Rajoyri iragan astean esan nion bezala, orain 155. artikulua abian jartzeak giroa gaiztotu egingo luke eta dena pikutara bidaliko luke” baieztatu du. Zentzu berean “eragile politiko,sozial eta judizial” guztiei eskatu die “behar bezain buru argiak izatea, konponbideak bilatzeko prest egotea eta, dagoeneko, nahiko konplikatu dagoen egoera bati zailtasun gehiago ez jartzea”.