Diputatuen Kongresuko Euskal taldeak Marlaska ministroari exijitu dio Kongresuaren Barne Batzordearen esku jar ditzala “berehala” iragan ekainaren 24an Melillako hesian gertatu zen ezbeharrari buruzko grabaketak.

Mikel Legarda barne gaietarako bozeramaile eta berrikitan mugako pasabidea bisitatu zuen ordezkaritzako kideak salatu duenez “Melillara joan ginenetik zortzi egun igaro arren oraindik ez dakigu ezer”. Are gehiago, diputatu jeltzaleak Gobernuak esandakoa ezeztatu du eta esan du Melillan ere Barne Ministerioko bozeramaileek ez zutela “bideo horien segundo bakar bat ere ikusi”. “Larriena da zabaltzen den mezua dela bideo horiek ikusteko moduan daudela eta gure eskuetan daudela. Gobernuak ere esan du, hala ez denean”, deitoratu du Legardak.

Horregatik, Melillako bisitatik zortzi egun igaro direla eta ezbehar haietatik bost hilabete beteko direla, Legardak Grande-Marlaskari exijitu dio “horrenbeste predikatzen baina horren gutxi praktikatzen duen gardentasuna” erakustea eta “berehala” bost orduko grabaketak Barne gaietarako Batzordearen esku jar ditzala.