Euskal Taldeak  berriz ere adierazi du Espainiako Konstituzioa eguneratzearen  alde dagoela. Kongresuan 69.3 artikulua aldatzeko eta, horrela, Gutun Nagusia erreformatzeko proposamenari 11 zuzenketa egin dizkio,  zuzenketak aurkezteko epea asteazken honetan amaituko delarik. Erregistratu berri dituen zuzenketa hauen bidez talde jeltzaleak berriz ere azpimarratzen du erreforma sakonak egin behar direla. Parlamentuko taldeek eztabaidatu beharko lituzketen erreforma horiek  artikulu batzuen aldaketa puntualaz harago doaz, orain bezala hainbat aldiz izapidetu baitira. Euskal Taldeak zuzenketa horiek aurkeztu zituen azken aldia 2024koa izan zen, Konstituzioaren 49. artikulua aldatu zenean.

Gaur erregistratutako zuzenketen artean, non 2. artikulua aldatzea eta xedapen gehigarri berri bat sartzea proposatzen baita, Euskal Herriaren erabakitzeko eskubidea aitortzea proposatzen du Euskal Taldeak. Era berean, beste zuzenketa batean, eta Euskal Taldeak hainbat aldiz planteatutako aldarrikapenarekin bat etorriz, Espainiako Konstituzioaren 56. artikulua aldatzea proposatzen da, Erregearen bortxaezintasuna mugatzeko.

"Euskal Herriaren eskubide historiko guztiak osorik betetzea, bere autogobernuaren adierazpen instituzional gisa, bere hiritargoaren erabaki eskubidearen bidez gauzatua, askatasunez eta demokratikoki ordezkatuta, eta egikaritze hau Estatuarekin itunduta”. Hori da EAJ-PNVk Konstituzioaren testuari proposatzen dion Xedapen Gehigarri Berria” "euskal errealitatea Estatu osoan modu atsegin eta iraunkorrean artikulatzeko formula" gisa, justifikazioan adierazi dutenez. Argudio berberari helduz, eta kontuan hartuta "konstituzio-esparrua ezin dela eta ez dela ulertu behar adierazpen demokratikoa mugatzen duen eta euskal herritarrek askatasunez adierazitako borondatea deuseztatzen duen esparru juridiko gisa", Euskal Taldeak 2. artikulua aldatu nahi du, “Estatua osatzen duten nazio eta erregioen autonomia eskubidea eta euren arteko elkartasuna aitortzeko eta bermatzeko”.

 Bestetik eta Euskal Taldeak azken urteotan aurkeztu dituen ekimen ezberdinen ildo beretik EAJ-PNVk proposatzen du EKren 56.3. artikulua aldaraztea Erregearen bortxaezintasuna mugatzeko eta zeregin instituzionaletara bideratuta, hau da, Koroaren ordezkaritza den aldetik egingo dituenetara.

Beste zuzenketa batean, Euskal Taldeak proposatzen du 155. artikulua ezabatzea “artikulu horretan bilatzen diren helburuetarako Konstituzioan erantzuna emateko aurreikusten diren mekanismoak nahikoak direlako”, bai eta 8. artikulua aldaraztea ere Indar Armatuen eginkizunei buruzkoak. Hala, “Indar Armatuei ordenamendu konstituzionala edo lurraldetasuna bermatzea ez dagokielako, demokrazian horiek biak justizia auzitegiek zaintzen dituztelako”, konstituzioaren testutik ezabatzen dira esandako eginkizunei buruzko erreferentziak.

Eskubide historikoen erakunde-bermea hobetzeko, bi zuzenketa aurkeztu dira, eta, horien bidez, bi xedapen gehigarri berri sortu dira. Xedapen horietan, alde batetik, «foru-gai propioak babesteko klausula» bat jasotzen da, eta, bestetik, «Konstituzio Auzitegiaren Foru Sala» bat sortzea, Eusko Legebiltzarraren legeetatik eta Lurralde Historikoetako Batzar Nagusiek beren eskumenak baliatuz emandako foru-arauetatik eratorritako gatazkak ebazteko. Era berean, EAEren eta Estatuaren artean Arbitraje Batzorde bat eratzea proposatzen da, dauden eskumen-gatazka guztietarako. Gainera, eta indarrean dagoen "eskumen-banaketa hobetzeko", 149. artikulua, Estatuaren Lurralde Antolamenduari buruzkoa, aldatzen duen zuzenketa bat erregistratu da.

Botere judizialari dagokionez, jeltzaleek proposatzen dute "botere judiziala Espainiako Konstituzioak proposatzen duen egitura deszentralizatura egokitzea; izan ere, egitura horretan sartuta daude jada botere betearazlea eta botere legegilea, Autonomia Erkidegoetan islatuz", eta, horretarako, 117. artikulua erreformatzen dute.

Azkenik, beste zuzenketa baten bidez, "Estatuan dauden komunitate politikoen benetako autonomia aitortzean oinarritutako lurralde-ereduaren garapen egokirako disfuntzionalitate" batekin amaitu nahi da. Horretarako, kendu egiten da lege autonomikoen etendura automatikoa, Espainiako Gobernuak lege autonomiko horiek aurkaratzen dituenean Konstituzio Auzitegian, Espainiako Konstituzioaren 161. artikuluan aurreikusitakoaren arabera.

Esteka honetatik jaitsi daitezke Euskal Taldeak aurkeztutako zuzenketak .